Waxaan maalintii ugu danbaysay wararka iyo baraha bulshada ku arkayay muuqaalo sheegayay madax waynaha somaliland mr muuse Bixi cabdi oo booqday reer daad ka qaaday laba caruur.
Horta ninka caruurta daadku ka qaaday ilaahay Samir iimaan ha ka siiyo cawil khayr qaba ha uGu bedelo, madaxwaynuhu wuu ku mahadsanyay booqashada uu booqday waxa uu gutay waajib bani aadan nimo iyo mid islaamnimo oo ina faraya in qofka dhibtu markay haleesho lays garab taago, lkn marnaba Kuma hambalyaynaayo madax wayne ahaan inuu booqday qoys dhibaato soo gaadhay, anigoo cuskanaya sababaha hoos ku qoran
1. Waa astaan kale oo niyad jab oo ina tusaysa in qoyskani nasiib u yeesheen in uu leeyihiin ama ka mid yihiin cid warkooda gaadhsiin karta madaxtooyada, halka qaar kale oo daad ka qaadayo, xaarwadada burco, caamuuda boorama, qalaxda gebiley,farxaskulaha laascanood ama Daamida hargeisa, warkooda aanu xitaa badhasaabka magaaladu maqal. madaxwaynuhu wuu u damqaday ilaahay xasanaad ha ka siiyo laakiin barnaamijkiisa madaxwayne nimo kumay jirin. Haduu madaxwaynuhu dadka la damqanayaayo oo uu la dareen qaybsanaayo, marka roob soo yeel yeesho waanu ka naxnaaye, ha ka naxo. Taasi waxay keeni doontaa inuu qorshe wada gaadha dadka la yimaado. Qorshahaas oo sheegay DADKA AAFOOYINKA U NUGUL DAWLADU WAXAY U QABANAYSAA WAXAA .
2. Madaxwaynuhu muxuu ka doonayaa hadii qorshe sanadeedka dawlada aanu hal shilin uGu jirin aafooyinka noocan ah, hadii aanan ogayn oo madaxwaynuhu xilsaaranyay inuu tago oo la baadho cida aafo noocana la kulanta raali ha layga ahaado lambarka degdega ahna ha laysoo sheego. miisaaniyada haayada ka hortaga aafooyinka oo marka hore ba iska kooban oo ah 7,226,841,312 qiyaastii (722,700 usd), hal shilin uma jiro, waxa la yaab ah in ka hor taga aafooyinka ay dawlada uga muhiimsantay martiqaadku, halka ay dawlada u qoondaysay 6,700,316,835 Qiyaastii (670,000 usd) waxaa lagu sheegay martiqaadka iyo munaasibadaha, waxa iyana cibaaro kale ah in warqaysyada loo qoondeeyay 1,443,850,662 (waa lacag 150,000 dollar ku dhaw), waxa loo qoondeeyay wargaysyada xafiisyada lagu akhristo (waa sidaan u fahmay) way fiicantay hadii intaa wargayska iyo munaasibadaha badhkood loo qoondeeyay loona bedelo barnaamijyo wax lagaga qabanayo aafada daadka, laydhka xilliga roobka, dooxyada dadka dhameeyay ama wacyi gelinta xilliga roobka ee dadka laagaha degan, maadaama facebuug iyo wabsiteyo hadda warku yaal, waaba hadii ay arrinta hore ta danbe ka muhiimsantahaye.
3. Madax waynuhu wuxuu wadanka joogay dhawr iyo labaatankaa sano ee somaliland jirtay, waan hubaa inuu tegay ama hore uga qayb qaytay qoysas dhibaatadan ku dhacday isagoo shicib ah, wuu la dareemay isagoo weliba ay ku jirto hadaad intaa wax kabadan tari karayso waad tari lahayd. Weliba madaxwaynaha waxa u dhawayd Laagta state houseka oo lagu yaqaan inay sanadkiiba tiro aan yarayn oo caruur iyo dad waawaynba leh qaado, madax waynuhu uma baahnayn inuu ogaada xogta rasmiga ah iyo sida caruurta danyarta daadadku u qaadaan, taa waa ka dheregsanay. Xukuumadihii tan ka horeeyay baa na baray in godka marka xildhibaan ama qof magac lihi ku dhinto la sameeyo, markaa wadaduna waa tii halkay tagtaana meel fiican maaha.
4. Waxaanan fahmin waxa uu warkaasi sheegayay waayo, In madaxwaynuhu meesha tegay oo dad badan farxad u ah, ayaa warka markaan eego ka xiiso badnayd in caruur meesha ku leedeen. Sida ka muuqata wasiirkii arrimaha debedaa marayay dawladda lamaheedii oo dhan baa marayay. Ma wax lagu faanaa in ay dawladii oo is dabayaacaysaa tagto qoys dhibi la soo deristay, arrintaasi waxay ila tahay HA LAGUU ILMEEYEE HORTA DHIMO.
Haddaba waxa is waydiin maxaa laga qaadan karaa in madaxwaynuhu booqday qoys dhibi la soo deristay?
Madaxwaynuhu marka waxyeelo noocee ahi soo gaadho ayuu tagaa qoysaska? madaxwaynuhu tollow kuwa caruurtu ka gubato ma u tagaa, qaar afar ka gubatay baa jiray? Yaa u xilsaaran hadii arrintan oo kale dhacdo, ma madax waynahaa? Mise waa talo farakahaadaay mooyi?
waxaan ku soo koobayaa marka qorshaha iyo majaraha guud lunsanyay wixii kasta waxa laga dhiga karaa guul, ka doonaana waxa uu ka dhigi karaa guul darro, sababtoo layslama qaadan sheegayaasha gusha ama guul darrada intaan hawshu bilaaban.alla haw naxariistee macallin gaariye gabayadiisii bay ka mid ahayd
nin dariiq xariiqdaa garan kara dayawdaye
Dhidarkii ku kacay danab doc kastaaba waw toos.
Wa bilaahi tawfiiq
Ahmed Saed Hassan
Local reacher and analyst
Siciidxasan@hotmail.com