Afhayeenka Xisbiga KAAH ayaa mar kale shacabka la hor yimid hadallo ay ka muuqdaan xiqdi, cuqdad, iyo cadho ururtay oo u qabo Xukuumadda Wadajir iyo xisbiga WADDANI oo uu hore uga tirsanaan jiray. Shir jaraa’id oo uu ku qabtay magaalada Hargeysa ayuu si aan xishood lahayn ugu weeraray mashruuc horumarineed oo xukuumaddu ka hirgelinayso dalka, isaga oo isku dayaya inuu tuuro dhagax uu isagu fuushan yahay.
Hadalladiisa oo ka tarjumayay uur-ku-taallo siyaasadeed oo uu u qabo xisbiga uu ka baxay waa hore, ayaa u muuqda kuwo uu ku doonayo inuu kaga farxiyo Guddoomiyaha Xisbiga KAAH oo uu maalin iyo habeenba si indho la’aan ah ugu guulwadeeyo, isaga oo ku raadinaya dano shakhsi ah oo ku dhisan hunguri siyaasadeed iyo kasbashada qalbiga iyo taageerada guddoomiyaha.
Waxa la yaab leh in afhayeenku uu moogan yahay isla markaana ka indho la’yahay ceebaha waaweyn ee dul hoganaya xisbiga uu u hadlayo. Musuqmaasuq, qandaraasyo maaliyadeed oo ilaa hadda la la’yahay meel ay ku dambeeyeen, iyo mashaariic horumarineed oo malaayiin dollar lagu maalgelinayay oo lagu lunsaday mas’uuliyadda Guddoomiyaha KAAH ee uu difaacayo. Isaga oo itaalka is leh ceebahaas waxaad ku qarin kartaa qaylo siyaasadeed oo aan wax micne ah lahayn.
Muwaadiniin badan oo qiimeeya horumarka ka socda dalka ayaa aad uga yaxyaxay weerarka uu afhayeenku ku qaaday mashaariicda muuqda ee xukuumaddu waddo.
Muwaadin ka mid ah shacabka oo Wargeyska Dawan la soo xidhiidhay ayaa yidhi “Xisbiga KAAH waxaan leeyahay miyaydaan wax is qabta lahayn? Miyaydaan damiir lahayn? Guddoomiyihiinnu miyaanu ahayn ninkii bulshada u soo bandhigay nashqaddii hore ee Madaarka Hargeysa, haddana ay ku dhammaatay Xero-digaagta?
Miyaad illaawdeen mashruucii biyaha ee Xumbo Weyne? Miyaydaan ogeyn musuqmaasuqii ka dhacay mashruucii wareejinta hawada Somaliland?
Idinka oo mucaarid ah, isla markaana xaq u leh mucaaradnimada, haddana ka xishooda inaad ka hadashaan waxyaabo ummadda dib u xasuusinaya ceebihiina iyo hagardaamada aad qaranka u geysateen, gaar ahaan arrimaha ay bulshadu maanta isweydiinayso sida biyaha iyo madaarada.”
Hadalkaas kooban ee Muwaadinka reer Somaliland ayaa si cad u muujinaya runta uu xisbiga KAAH isku dayayso in uu ka cararo. Guddoomiyaha Xisbiga Kaah oo ku fashilmay masuuliyaddii loo igmaday xilligii uu ahaa wasiirka awoodda badan iyo cayayaanka uu beertay, ayaa maanta isku dayaya in ay dhaliilaan horumarka muuqda ee dalka ka socda. Sidaa darteed Xasan yaraha afhayeenka u ah xisbiga KAAH waxaan leeyahay “Maxaa Ceebta Mooskaaga Taalla Magane Kuu Geeyay”
Guntii iyo gabagabadii, Mucaaridku xaq bay u leeyihiin in ay dhaliilaan, xukuumadda iyo wax kasta oo ay u arkaan in ay toosin u baahan yihiin, balse dhaliishu waa in ay tahay mid waxtar leh oo ku salaysan run, xaqiiqo, caddayn iyo masuuliyad. Maaha in dhaliilaha mucaaridku ay noqdaan kuwo lagu qariyo khaladaadka ama ceebaha ay iyagu leeyihiin, iyagoo si been ah u eedaynaya cid kale iyo in la abuuro eedo aan jirin oo loo adeegsanayo in bulshada lagu majara-habaabiyo.
.