Hargaysa (Ceelgardinews.com) Xilligan waxa kale oo warka arrintan la ogeysiisyey masuuliyiin sare oo badan, tusaale ahaan Kayaani waxa uu qisada oo dhammaystiran uga warramay taliska ciidamada difaaaca cirka iyo weliba midhad taliyeyaasha hoose ka mid ahaa oo uu ku kalsoonaa.
Sarkaalka ka hawlgabay sirdoonka Maraykanka ee xogtan bixiyey waxa uu sheegay in haatan xaalku marayey meel ay masuuliyiinta sare ee sirdoonka Maraykan si fiican u og yihiin in Bin Laadin uu gurigan ku jiro, iyada oo la adeegsanayo dheecaanka DNA ee ay soo qaadeen dad iska dhigayey in ay Tallaal u wadaan carruurta oo gurigan tegey. Waxa kale oo ay Maraykanku xaqiiqsadeen in Bin Laadin uu yahay maxbuus xabsiguri ku jira oo gacanta ugu jira Baakistaan, waana sababta keentay in ciidamadii hawlgalka dilka Usaama fulinayey ee Maraykanka ahaa aan la soo raacin diyaarado dusha ka ilaaliya ammaankooda, ciidan kale oo ciidanka gudaha guriga galay ka ilaaliya in dhabar-jebin lagu sameeyo iyo haddii difaac uu gudaha gurigan kaga yimaaddo gurmad soo xoojiya.
Waxa ay ahayd arrin iska cad oo gebi ahaanteedba ahayd khaarajin la soo qorsheeyey oo si ku talogal ah, sidii heshiiska Sirdoonnada Baakistaan iyo Maraykanku dhigayey la khaarajiyey Usaama Bin Laadin. Taliyihii hore ee ciidamada sida gaarka ah u tababaran ee SEAL, oo hawlgeliye ka ahaa, kana qayb qaatay daraasiin weerarro ah oo tobankii sano ee u dambeeyey uu sidan oo kale Maraykanku u fuliyey ayaa qoraaga buugga u xaqiijiyey, “In aanu marnaba qorshaha Maraykanku ahayn in Usaama Bin Laadin nolol lagu soo qabto. “Sharci ahaan marka la eegana, waxa aanu ogeyn waxa aanu Baakistaan gudiheeda ka samaynaynaa in uu yahay dil sharci darro ah. Arrintaas waa aanu fahansanayn. Markii aanu hawlgalkan sii gudog galaynayna mid kasta oo naga mid ahi waxa uu ka kale ku lahaa, “Aynu waajahno xaqiiqda. Waxa aynu u soconnaa in aynu galno dil sharciga aan la marin”
Laakiin Guriga Cad markii dambe waxa uu ku andacooday in Bin Laadin uu haab-haabtay hub uu isku difaaco, taasina ay keentay in ay ciidamo dileen si ay naftooda u difaacaan. Waxa ay ahayd qiso been abuur ah oo loogu jawaabayey dadkii markiiba su’aasha geliyey sharciyadda uu maamulka Maraykan u haystay in uu galo barnaamij khaarajin ah oo lagu dilayo qof iyada oo aan maxkamad la hor keenin. In kasta oo aad loo faafiyey war ka duwan beentaas maamulka Obama uu ka sheegay arrintan, welba dad qaarkood xog-ogaal ahaayeen ay xaqiijiyeen in Usaama Bin Laadin la dilay iyada oo aanu wax hub ah sidan, dagaalna gelin, haddana maamulka Obama waxa uu ku adkaystay oo ku celceliyey in Usaama Bin Laadin ay doonayeen in ay nolol ku soo qabtaan, haddii uu is dhiibi lahaana nolol la qaban lahaa isaga oo bedqaba.
***
Aynu dib ugu noqonno saacadihii iyo maalmihii yaraa ee ka horreeyey dilka Sheekh Usaama bin Laadin. Kaamboolka uu ka deggenaa Abbottabad waxaa la dhigay ilaalo ka socota sirdoonka Baakistaan ee ISI oo 24 ka saac, aan mar keliya joojinayn ilaalinta iyo la socoshada dhaqdhaqaaqa Usaama Bin Laadin, xaasaskiisa iyo carruurtiisa. Ilaaladan weligeedba dul joogtay dhismahan waxa soo gaadhay amar kaga yimid taliyeyaasha sare ISI oo u sheegay in aagga oo dhan ka tagaan marka ugu horreysa ee ay maqlaan guuxa diyaaradaha qummaatiga u kaca ee Maraykanka.
Magaalada Abbottabad oo dhami waxa ay ahayd gudcur: Sirdoonka Baakistaan ee ISI ayaa waqti yar ka hor bilaabashadii weerarka Maraykanka waxa ay masuuliyiinta warshadda Korontada Abbottabad amar ku siiyeen in ay laydhka magaalada oo dhan ka demiso. Mid ka mid ah diyaaradaha Maraykanka ee Qummaatiga u kaca oo noocoodu ahaa Black Hawks ayaa markiiba intii aanay waxba bilaabin waxa ay duqaysay gidaarka deyrka ku wareegsanaa Kaamboolka uu deggenaa Usaama oo aad u dheeraa, waxa aana dhacay shil ay ku dhaawacmeen inta badan ciidankii diyaaradda saarnaa. Waxaa jira warbixinno aan ahayn buugga Hersh oo iyaguna sheega in ay dhinteen inta badan ee ciidankaas saarnaa diyaaraddani. Hersh oo buuggiisa kaga sheekaynaya qaabka uu u dhacay weerarkan oo ahaa nooca cilmiga Milaterigu afka qalaad ku yidhaahdo TOT (Time on Target), oo macnaheedu yahay in ciidanka goob weerara qaybihiisa kala duwani hal mar rasaasta iyo weerarka wada bilaabaan, isaga oo soo xiganaya sarkaalkii hawlgabka ahaa waxa uu qoray, “Raggani waa ay ogaayeen in hawlgalkoodu uu yahay TOT, sidaa awgeed waa in amnigu dusha sare aad loo ilaaliyaa, waayo waxaa dayaanka rasaasta ku toosaya dadka magaalada oo dhan” Burburkii diyaaradda ka dhacday Maraykanka ayaa iyadana lagu dhuftay gantaal kuwa wax burburiya ah, si aan raad looga helin, waxaana qasab ah in diyaaradda burburkeedu uu samaynayey qaraxyo dhowr ah oo iska daba dhaca iyo weliba olol dhowr Mayl laga soo arki karayey.
Sida qorshuhu marka hore ahaa laba ka mid ah diyaaradaha Maraykanak ee Chinook ayaa iyaguna ka soo duulay Afgaanistaan oo fadhiistay xarun sirdoonka Baakistaan leeyahay oo ku dhow xadka, si ay taageero farsamo u bixiyaan, mid ka mid ah labadaas diyaaradood ayaa isla markii diyaaraddii guriga Usaama ku dhacday burburtay loo soo duuliyey Abbottabad si ay u buuxiso kaalinta diyaaradda dhacday, ciidamadii saarnaana u soo gurto. Laakiin maadaama oo ay diyaaraddan la dirayey ee Chinook ay caadi ahaan marka hore sidday taangi weyn oo ahaa kayd shidaal oo loogu talogalay labada diyaaradood ee Black Hawk ahaa ee hawlgalka ku jiray, waxaa qasab noqonaysa in imika farsamo ahaan dib loogu noqdo oo gudaheeda loo diyaariyo qaabka diyaarad xamuul ah oo ciidanka soo guri karta, qalabka iyo taangigan laga furo.
Burburkii diyaaradda Black Hawk ahayd iyo baahda soo baxday ee la rabay in la helo diyaarad beddesha ta burburtay, ayaa noqotay arrin acsaabta kicinaysa waqti badanna lumisay, si kastaba ha ahaato ee ciidamadii Abbottabad ee guriga Usaama weeraray iyagu waa ay ku sii socdeen hawlgalkoodii. Wax rasaas difaaca ahi kama ay hor iman gelitaankooda Kaamboolka; sida aynu hore u soo sheegnay Usaama maxbuus ayaa uu guriga ku ahaa oo ilaalo hubaysan ma’ uu haysan, ilaaladii xabsiguriga ku ilaalinaysay ee ISI ka socdayna waa tii la fasaxay oo sidii amarka ay qabeen ahaa markii diyaaradaha Maraykanku guriga ku soo dhowaadeenba goobta waa ay iskaga hulleeleen. Sidaas nabadda ah ayaanay Maraykanku gudaha ugu galeen Kaamboolka uu deggenaa Usaama Bin Laadin.
Qof kasta oo reer Baakistaan ahi waxa uu sidiisaba iska haystaa qori, dadka magaca leh, madaxda ah ama maalqabeenka ah eek u nool magaaladan Abbottabadna waxa ay haystaanba ciidan ilaalo hubaysan ah, markaas wax iska caadi ah ayaa ay noqon lahayd in gudaha Kaamboolka Usaama loogu tago hub fudud oo ay haystaan dadka deggen gurigu, laakiin taasi ma’ay dhicin oo qori looguma tegin, waxa aana halkaas ka muuqanaysa in dadkan guriga deggeni ay ahaayeen maxaabiis hore looga ilaaliyey in ay hub haystaan. Haddii qof uun gudaha gurigan ku jiraa hub haysan lahaana si fudud ayaa uu u waxyeellayn lahaa ciidamada ku soo daatay, oo sanqadha iyo qaraxa diyaaraddu ka soo horreeyey, sida uu xaalku noqon lahaa, waxaa inooga warramaya, sarkaalka hawlgabka ah oo ku soo koobay, “Haddii wax jawaab difaac ahi jiri lahayd, si weyn ayaa ay u baylahsanaayeen (Ciidanka guriga galay). La soco…